لو عشت أصعب لحظة بإنتظارك    
         الأصعب أيأس لحظة من رجوعك

كل الليالي تقول.. ليلة قرارك    
         للصبح : ياصبح استحاله طلوعك

مدري بعادك غصب أو باختيارك    
         بس الوكاد الحال بعدك يروعك

يا عين نورك غاب بأول نهارك    
         بالله وين اللي يكفكف دموعك ؟

أشعلت شوقي نار .. وأضرمت نارك    
         ومن متى جمر الشوق دفّا ضلوعك

قل بس برجع وأنتظر في مدارك    
         العمر كله مع بقايا شموعك

واْبني بنبض القلب في القلب دارك    
         الروح لك تظمأ وعيني تجوعك

واْعيش عمري لحظة بانتظارك    
         بس المهم تتم لحظة رجوعك