أحــس كني فاقـده كــل ذاتــي    
          مدري وش اللي بعدها يحتريــني

من يوم غاب اللي حضوره غناتي    
          وانا ادري ان اقصى المواجع تبيني

حاولت ألملم بالقصايد شتاتي    
          أثـر القصـايد همهــا محتوينـي

وشلون أبا اهرب من بعض ذكرياتي    
          دامـه جميــع الذكريــات وحنيـني

من قبل ما البس برقعي أو عباتي    
          وغــلاه لابــس نبضـة القلـب فيني

كنــت أفتــخر قدام كـــل البنــاتي    
          واقــول: هــذا اللي أبيــه ويبــيني

وكــان الــغرور بداخلي مـن صفاتي    
          وكــان الجــنون بدنيــته يعترينــي

واليوم والله راس مــالي سكــاتي    
          ونظـرة وداع ســاكنه وسط عيــني

اعيــش فيهــا مــا بقى مـن حياتي    
          مـا همني مــن بعدهـــا وش يجيـني

لابد مــايوم يجيـــبه ويــاتي    
          ويـشوف بعيونــه سوايــا سنــيني