الشعر موقف والشعر وإن كان ما هز الوجود     
         وش ينبغى به وأشهد أن ذي فرصتي وأنا لها

الحمد للي يسر الموقف وبارك بالجهود     
         بالحفلة اللي من سمع ترحيب أهلها جالها

يا مرحباً ترحيبة تمزج بطيب وريح وعود     
         باسمي وباسم شيوخ حرب وباسم كل رجالها

يا خادم البيتين لك منا مواثيق وعهود     
         نمشي بدرب أجدادنا ما يختلف منوالها

يا الحاكم اللي كل ما زادت به الدنيا يزود     
         حب ووفاء للديرة اللي نستظل ظلالها

وحنا قبايل حرب عدوان النصارى واليهود     
         ما ننشد أهل المعركة عن عرضها واطوالها

تامر علينا كلنا وحنا تحت أمرك جنود     
         لله ثم لها الديرة اللي ما نسينا أفضالها

والله ما تلقى بيننا يا سيدي رجل شرود     
         حنا الشجاعة شاربين باللقا فنجالها

وليا اختلط بالجوع عج وصارت الأيام سود     
         (حنا لها) يا سيدي (حنا لها) (حنا لها)

وكثر الكلام الناس قالوا قبلنا ما فيه فود     
         والي يبرهن صحة أقوال الرجال أفعالها