غروٍ نطحني يجرّ الغـيّ ويـل أمّـه    
         مثل أمّي أنّه عذاب الروح مثل أمّـي

عليه لبّسني إبليـس الهـوى عِمّـة    
         وابليس من قبل بن خالي وابن عمّـي

يا ليت من هو تليّن في طـرف كمّـه    
         اليا تمدّد طـرف كمّـه علـى كمّـي

غروٍ ذبحني وانا مـن لحمـه ودمّـه    
         وش بقّىْ للي مهو من لحمي ودمّـي

لا جيت اخمّه وقلـت الخمّـه الخمّـة    
         قال :ابتعد يا ولد بدري علـى خمّـي

ما يدري انّه خبر (إنَّ) وأنـا ضمّـة    
         يا حلو حلو الخبر مرفـوع بالضمّـي

يوم انكشف لي نحَرْه وبانـت الزِّمّـة    
         قامت شياطيـن بقعـا تزمّنـي زمّـي

يا عين شيهانـةٍ فـي عالـي القمّـة    
         قمّت بريشٍ وريش البُرْق مـا قمّـي

لو في بريقعْه رحمـة كاشـف الغمّـة    
         ما كـان زوّد سـواد بريقعـه غمّـي

الزين إلى جاء لزيـنٍ ناقـصٍ تمّـه    
         والله لولاه حسن البيـض مـا تمّـي

زينٍ عليّـه تغيّـر وانعَسَـر صمّـه    
         نسى ثلاثـة ليـالٍ عسْرهـا صمّـي

ومن صار لي في الرخا عبدٍ وانا عمّه    
         لا جاء القسا صرت له عبدٍ وهو عمّي

سقى الولي يوم انا دلوٍ وهـو جمّـة    
         واللهْ ماْيسقينـي ألا صافـي الجمّـي

يا لعنبـوه انْ مدحتـه كنّـي آذمّـه    
         وغيره تمنّاني اقصد بـه ولـو ذمّـي

مدري على اسم القمر سمّوه يا يُمّـه    
         والا على اسم الغضي وجه القمر سِمّي