قصيد،قصيد نت،شبكة قصيد،قصائد شعراء،قصيده،قصائد،شعراء،شاعرات،شاعر المليون<<وش

وش بلا دمعتـك سالـت يمـال الذهـاب
         ضاع كدك كذا يا مـال شيـن النصيـب

ديـرة عمّـروهـا مْبلّمـيـن الـكـلاب
         لا يشهّيـك مقطـان عليهـا خصـيـب

القط اللي تهيّـا وانـت فـوق الركـاب
         لا تنوّخ وهي بيـن الصعـب والصعيـب

قبلك مربّـع فـي الـروض حيّـه وداب
         الخضر مـات والأصفـر ليانـه ذهيـب

لا يجي الشيب راسك وانت توّك شبـاب
         والله انّ الخنا ينبت على الـراس شيـب

لا تصدّق ابه حـبّ تـرى هـو سـراب
         ماه لو طال عدوك مـا يخضّـر جديـب

الهوى راح مع من راح مخلـب ونـاب
         مابقى فـي ثمايـل جمّـه الا السريـب

احذر اللي مع الأسـواق مثـل الـدوابّ
         قاصـرات المشالـح موميـات السبيـب

بندق العود الاعمى مـا تجـدّد صـواب
         لو فشقها حمر ما طـاح منهـا صويـب

ولا يعوض السلَم عن باتـرات الحـراب
         لا وربّ فـرق بيـن العـدو والصحيـب

وان تبدّلـت صارمهـا بسلـك الربـاب
         والله انك خبيـث لابـس ثـوب طيـب

شم عن اللي طرفهـا دايـر مـا يغـاب
         كـلّ زول تلفّـت لـه بنظـرة حبـيـب

لا تجي مثـل سالفـة الغبـي والغـراب
         يوم وثق به العروة غـدا فـي القليـب

لابن برمان طيره في الهدد ويش جـاب
         يالمبلّـم تعلّـم مـن يــودّي يجـيـب

والهوى مـا يطهّـر للعـذارى جـراب
         ومن يرى غير هذا عدّ ملعـون صيـب

عرضهن مثل مصقول القـزازة مُهـاب
         بصمة الأصبـع الطاهـر عليهـا تعيـب

حطّ للوقت شلفـا مثـل شلفـا (ذيـاب)
         درْ على من نسبهم مـا يفشّـل نسيـب

ليث غاب يـدوّر لبوتـه وسـط غـاب
         لا يغّـرك شـروق هـو بدايـة مغيـب

در على بنت حرّ شـان حظّـك وخـاب
         في ولدها ليا جـاء هقوتـك مـا تخيـب

ابنة اللاش لو تسقيـك حلـو الرضـاب
         ورعها يجيك مثله مثل غصـن رطيـب

لا يقضّـي لـزوم ولا يـوقّـر جـنـاب
         ولا يقـوّي عـزوم ولا يـدوّر طلـيـب

انتبه لا يجي عقـب الثبـات اضطـراب
         وانتبه لا (خبيب) المشي يرجع (دبيـب)

من بعد ذا علـى نيّـة وفـا وانتصـاب
         ذروة الشاهق الحـر العـلا يـوم هيـب

يا هل السمحة الفجّا النحر مـن عـراب
         والبطاين مثل جـوخ الملـوك السليـب

من ركايب ركايـب مـن ركـاب ركـاب
         من نجايب نجايـب كـلْ نجيـب نجيـب

ما هي مْن الذي ذبّـوا عليهـا المطـابّ
         لين عوّد نحرهـا فـي ظهرهـا حطيـب

من عطايا الولي ملحـا تشـقّ الرغـاب
         ما رعوها مسبّرة السلـق فـي الحديـب

كنّهـا عيطمـوس لابسـه بشـت كـاب
         هزّت الخصر في سوق الهوى من قريب

مثل من رقصوها جنب (عمـرو ديـاب)
         يوم ترمي الحيا تحت اسم (فديو كليـب)

ذا لها اربع سنين مـا تحـق الضـراب
         حايـل كـنّ اذانيهـا مفـاريـد ذيــب

النواظـر مجامـر سمـر والا شـهـاب
         نظـرة مْحنشـل دون الجهامـة عزيـب

والخشيـم ادغـم كنـه طليعـة عقـاب
         ويتنفّـس تنفّـاس الشجـاع العـريـب

من فريد الوحش فيها الوصايف عْـذاب
         مدمـع ومسمـع وفـزّ وكـزّ وجذيـب

حايـل كـنّ اسافلهـا معامـد خــراب
         وكنّ اعالي قراها سرحـة فـي شعيـب

والله انّ البطـن لـولا عيونـي جْـذاب
         ما لمحته وهو بيـن الحقـب والحقيـب

شوف دقّ ابرة الخيّـاط تحـت الثيـاب
         عندي اسهل ترى من شوفته يا صهيـب

الحقب يوم مسوا به على البطـن شـاب
         البطايـن طبايـن والمحاقيـب شـيـب

ملتوي كنّه القوس القزح فـي السحـاب
         يوم خيّل علـى وجـه السمـا مستنيـب

والشعف لا رهَف واسْفت عليه المهـابّ
         قرن عمهوجة شقـرا غـدا لـه لهيـب

طبّت الملعبـة مـا مـن جسدهـا لـذاب
         غير كتف وردف فـي الملاعـب لعيـب

جـادل فـي مخيّـم رقّصوهـا شـبـاب
         واطربتها أغنية (رهيـب والله رهيـب)

العبَس يـوم حـزّب فـي شعفهـا وراب
         دبْس هجريّـة فـي حُقّهـا يـوم ريـب

كـنّ لجّـة سفايفهـا لنـارت تـسـابّ
         خفّها في متيـن الرمـل ينحـب نحيـب

كنّها يوم تلْـد الصـوت تلقـي خطـاب
         وان قصر صوتها اسمع دقّـة العندليـب

حلو الايقاع ترقص له قـرون الهضـاب
         لو سمعه الجبل في الحال يقنـب قنيـب

ما علـو كُورهـا الا فارعيـن الرقـاب
         وما علوها علـى حـرد الشـدادي ؟؟؟؟

ولا نقلنا لها جردا العصا مـن الزهـاب
         دوب نرجع عليها الصوت تهذب هذيـب

روّحت كنّهـا البـرق الختالـى رْعـاب
         هازها مخلب اشقرْ في المهامـة عطيـب

يوم تدبح مـع الطلعـات شـيّ عجـاب
         ويوم تسبح مع النـزلات شـيّ عجيـب

في السهل كنّهـا يخـت يشـقّ الغبـاب
         الهبايـب هـدنّ ومايـج البحـر اديـب

وفي الوعر لا ثنت بالحيل خـفّ يـلابّ
         كنّها السيـل مـا قدمـه يحطّـه حزيـب

ولاادبرت كنّهـا عـن دينهـا تستتـاب
         ناحـرت دار الاسـلام المسمّـى منيـب

ولا اقبلت كنّها الشامـان يـوم المقـابّ
         ورّدوه الطنايـا فـي النهـار العصيـب

لا ركبها غبار الـدرب مثـل الخضـاب
         في جديل اسمر الخدّين عيـن القضيـب

دوب اخلّص كلامي والحق البـاب بـاب
         لهْي قد جـت بـردّه دون شـكّ وريـب

لا ولا جنّـي سْليـمـانٍ لْـهـا يـنـابّ
         لا ولا اللي كشف له ربّ الارباب غيـب

أنت ما تسمـع الله فـي ايـات الكتـاب
         يوم يهدي على البـل كـلّ قلـب لبيـب

لا لفح وجه راكبها مـن الشـوق هـابّ
         مثل فايح دخـان فـي سـراج ضبيـب

يا بـدر يـا سلايـل محتميـن المـرابّ
         يوم تسمـع لجيـش الفارسيـة طريـب

نصّها صوب ولد العـمّ وافـي الحسـاب
         للمعكلي نبـي ثـرّ الذهـب يـا حسيـب

من صلايب مدفّنة الركـب فـي المـذابّ
         شمّر اليا كسـر حلقـة حريـب حريـب

قل لتركي ليا مـنّ اشقـر البـن طـاب
         السبيعي علـى خيـط المهالـك مثيـب

من ثوابه عـذاب ومـن عذابـه ثـواب
         يالله اني دخيلـك يـوم يخطـي يصيـب

في عيوني سيوف مـن سطرهـا تقـابّ
         وفي خفوقي يصيح (مهلهل) يا (كليـب)

صابني من بعض فعـل الرجـال اكتئـاب
         خاطري من ردى فعلـة رفيقـي كئيـب

الرواسـي تعـلّـى فوقهـنّـه ذبــاب
         بهذلتنـا ليالينـا وانـا اخّـو( شبيـب)

يا عزيزي زمانك بـشّ نـوره وغـاب
         مقفي مثل منزوع البلَـح مـن عسيـب

لو نقصّـر يدينـا اغتصبنـا اغتصـاب
         ولـو نطـوّل يدينـا قطّنـا بكـل عيـب

يا عزيزي زمانك فـي سؤالـه جـواب
         يسأل وهو فـنفس الوقت عنـا يجيـب

في إيابـه ذهـاب وفـي ذهابـه إيـاب
         يـا مـدوّر ورا الزلـة دْوَرْة الذهـيـب

الليـالـي دول وايامهـنّـه ضـبــاب
         تصبح الصبح (قصر)وتمسي الليل (سيب)

لو تزخرف على وجـه الحقايـق نقـاب
         الحقيقـة لهـا وجـه قفـو مـا يغيـب

سلّة السيـف مـا تومـن بليّـا نصـاب
         وشذرة الحدّ مـا تمسـك بليّـا قضيـب

يا عزيزي زمانك لو دمـث لـك جنـاب
         جرّته مـا تخلّـص وافـي مـن هليـب

قبلك (العود ابو مخطـر) كـلاه الهبـاب
         رضّعتـه المنايـا مـن ثمرهـا حليـب

ثبّت الزيف فـي ثـوب مـن الانقـلاب
         فوق وجناته الاربع (هـلال) و(صليـب)

ولو عن اللي قسمه الربّ الاعلى حجـاب
         ما مشى حـيّ الا وعـن يمينـه طبيـب

لا سقـى الله زمـان يرتقبنـا ارتقـاب
         صـار كـلّ علـى كـلّ عتيـد رقيـب

ويا سقى الله زمان يـوم حنـا اتحـابّ
         يوم انا جندي ويـوم انّ غيـري نقيـب

بـسّ والله ولـو ذقنـا كريـه الشـراب
         ما نبيّـن لعـشّ البـوم منـا حضيـب

مـن تكلـم حثينـا فـي فمـه بالتـراب
         لين ينقصّ حبـل مـن غـروره قطيـب

من نباح الكلاب ايش بيضـر السحـاب؟
         الثوابـت ثوابـت والذهيـب الذهـيـب

ومن يبي العز ينزل فوق روس القبـاب
         ما يبي الطيب نشدة شيـخ والا خطيـب

يـا زمـان الخـدم ومصلّحيـن الكبـاب
         ما نبي منك غير الستـر ولا تستجيـب