قلت اجمَّعً برد ليلي وهمَّي وحْطبي    
          قلتها واقصى ضلوعي ذيابٍ عاويه

الشتا يرثع ورا البالْ والليلْ يحبِي    
          والطعون اقفت فرادا وجَتْ متخاويه

صاحبي لي مرَّك الشوق مرّه مرّبي    
          لا تجيني معْ هجوسٍ تجيني ضاويه

آه يا صعب اغتر ابي بَعَدْك وما اصعبي    
          عقبك الدنيا بعيني غدت متساويه

آه يا قِصر المسافهْ ويا طول تْعبي    
          والهبوب ان فرّع الجرح جمره كاويه

آتطوى كنَّي القاع لا هجهج ظبي    
          كل ما اصرد بعيني تضيق الزاويه

ليه يا درّة شبابي ولولي وذْهَبي    
          ليه خّليتِ الحنايا عروشٍ خاويه

يوم تضحك لي عيونك عيونك وش تبي ؟    
          كم لها تشرب نحولي ولا هي راويه

لا غلاك اكبر ذنوبي ولا قلبي نبي    
          الله اعلم والمقابيل وشهي ناويه ؟

الجفا ما هو على البال والبعد يْهَبي    
          والظنون اللي غشت جِرّتك للهاويه

صاحبي صاحت بي البيد ((تكفى ياصبي ))    
          ما تقطّعك الفيافي عزومٍ ثاويه

كل حلمٍ يا اهيف القدّ بالصدر مخَبي    
          حروةٍ يملا سماها وعودٍ غاويه

ما مَلَت عين المًشاريه هَزَّتْ منكبي    
          لو يصير الحلم شعْرَه واصير معاويه

قلت اجمّع برد ليلي وجوعي وحْطبي    
          قلتها واقصى ضلوعي ذيابٍ عاويه