على غير عادتها تخيل العيون بْروق    
          تكاشح على جفن الزمن والزمن غافي

تشرّه على جِرد الفيافي حزين الموق    
          تذوب الخطاوي ما تطاولْت ميقافي

متى تصحي الدنيا متى يا زمان تفوق    
          متى ترخي الغيمه هدبها على اكتافي

متى تكسر الخطوه مداها واهدّ الطوق    
          واسوق الدروب لْفجْرَها والقدم وافي

انا يا الليالي ما لبست النهار شقوق    
          لو ان الرجا جذْعٍ على جال ميهافي

حضنت السحابه والعطش بلّل اطرافي    
          زَبِنْت الغَمام وهزّني للقصايد شوق

نحَرْت الخيال ولا تنشّدت عرّافي    
          أذبّ الهجيني وارفع الصوت بالطاروق

على هجعة الموجه سرى ليل مجدافي    
          هلا يا القصيد وكل عين وعَدْها فوق

لقيتك خويي ساعة الضيق وسْنافي    
          ينوش السما ظلَّك تلج بْثراك عروق

تقوم الهقاوي طولها والمدى ضافي    
          هلا يا القصيد اليا انتخى بك رفيع الذوق

تهاما على صدر ابيض الطرس رعَّافي    
          سقاك البدر قمرا سريت ولحقت لْحوق

وانا خَابِرك لمصافح النور ميلافي    
          لك القاع غيمه والسما لك نَخَلْ وعْذوق

لك الكون مسرى بين مشتى ومصيافي    
          تمرّا بوجه السالفه لو تجفّ حْلوق

تخاف القلوب وطيّب الشعر ما خافي    
          تسامى تسامى للّيالي عليك حْقوق

ما دامك على وضح النقا ما بك خْلافي    
          فدتك القلوب المظلمه لو تجفّ حْلوق

نساها البياض وقام يسفي بها السافي