يا ابن الحلال انت وش تبغى بها الدمعه     
          بتموت ماشفت دمعة ذلّ من عيني

ماني حبيبك اذا ضحَيت بالسمعه    
          لا ذلّني حب ويش اللي تبي فيني ؟

لا تكسر الودّ يجرح راحتي جَمْعه    
          يكفيك جرْح الحشا لا تجرح يْديني

لا تَزْهم الليل كل اللي بقى شمعه    
          هي كلّ شي تبقّى بينك وبيني

وهج المكَابَرْ تراه بْيحرقك لمعه    
          باكر ترى اقول لك ما عاد يمديني

ابعدْتني والقلوب القشْر مجتمعه    
          دايم وانا القاك دايم وانت مغديني

أدور انا وانت مثل السبت والجمعه    
          يا قربنا والصحيح انّا بعيديني