آخر عباراتي وداع آخر مشاويري رحيل    
          جيتك وبي لفحة ظما واقفيت كبدي ناشفه

اصعب كلام اصعب خبر صرخه عقب صمتٍ طويل    
          مثل الهدوء اللَّي سبق لحظة هبوب العاصفه

وانتي بمتناول يدي تبدين مثل المستحيل    
          في عشرتك صوت العقل يقتل طموح العاطفه

الحب ما هو كلَّ شيْ الى وقف حظّ بخيل    
          قلوبنا اصفى من العسل بس الظروف مْصالفه

لا للندم لا للعتب او شيّ من هذا القبيل    
          وانتي ما جا منك خطا حتى تقولي آسفه

من غير ليه استسلمي واستلهمي صبرٍ جميل    
          ولا تسأليني وش جرى ما لك بطول السالفه

قولي لهم يا عزوتي ما عابنا موت النخيل    
          اللي يوافيها الأجل وتموت لكن واقفه

آخر عباراتي وداع اخر مشاويري رحيل    
          جيتك وكبدي ناشفه واقفيت كبدي ناشفه