|
ضاق الغمام وفحّ صدر المزاريب
يا الله بجاهك يا عليم الغيوبي
يا منجي يوسف من الجبَ والذيب
بحماك يا ساتر خفايا عيوبي
صاحوا تناخوا دوروا بي عذاريب
تجمَّعوا ليلة وزا سولفوا بي
أثري مسوي بالقلوب الأعاجيب
وانا مثل وجه السما نقش ثوبي
انا وسيع بْطان راهي مطاليب
ما اضيق لو شانت نوايا دروبي
آرد وأصدر وآخذ العلم واجيب
ماني على طرش الرعاع محسوبي
برّدت كبدي من قراح المشاريب
دوبي رويت من الشهاليل دوبي
خلّيت للحاقد طشاش وحثاريب
يتوب والاَّ قلعته لا يتوبي
شعري زها بجباه بيض المكاتيب
شعري على طرياه هبّت هبوبي
شعري رسايل عيد طيبٍ على طيب
عطر الشمال وهفهفات الجنوبي
شعري وسايد مترفاتٍ رعابيب
شعري لوى تلعات الارقاب صوبي
سعري شهد له طيبين المجاذيب
وش عاد لو سود النوايا حكوبي
لو كان مالي غيرها من مكاسيب
ما ابغى شهادة ميتين القلوبي
|
قم بتسجيل الدخول اولا للتمكن من التعليق على القصيدة