من زمان تْسولف الريح عن شاله    
          كلّ عطرٍ ساقت الريح من يمّه

وش عليه ان مرَّني شايفٍ حاله    
          كم صباحٍ سيّل الشمس من كَمّه

كم هبوبٍ عرْسها لَتْم شلاّله    
          كم تِرَشفْه الشفق وانتثر دمّه

لو فهْم جَمْر النَحَر عِذْر سلساله    
          ما تضايق مايس القَدّ من زَمّه

لو عيونه تجرح الشوف مختاله    
          ما تِملّ عْيون مغليه من ضَمّه

ليه اسمّي سود الاهداب قتَّاله    
          والحياه بْساهي الرّمش ملتمّه

ليلة انه بينهم كِنَّه لحاله    
          ضاع قلب وضاعت ازوال بالّلمَّه

ما نشدته طيَّبَ الفال عن فاله    
          جيت ما ادري تايه الراي واليَمَّه

آتلِمّس بين الاضلاع منزاله    
          واثره اللي في ذرى القلب ما هَمّه

مِتْرَفٍ يومي دلاله ويبرا له    
          يوم كلَّ يمدح الشوف ويْذمّه

ما تورّث زين عَمّه ولا خاله    
          يا ولْد عمّ القمر يا القمر عَمّه