جيِتك بقايا حيّ كل اكثره ماتْ     
          وَصلْت لِك بآخر رمق من حياتي

جيتِك خويّ الخوف رحلة الذات    
          بين الرجا وظْروفي القاسياتي

جيتِك من الفرقا كثير التلِفّات    
          جيت انتحر في نِجْلِك الناعساتي

جيتِك مزيج جْروح ودْموع وآهات    
          نديم لعْيون الأسف والشماتي

جيتِك شظايا تشتعل شوق بسْكات    
          ما ادري حِزِن ما ادري سعاده سكاتي

جيتك لو أني سابع المستحيلات    
          اللي يحبّك يصنع المعجزاتي

جيت استجيرك من شموس المتاهات    
          عيّت تظّللني تحتها عباتي

وابـ آتعفّى من عذاب المعاناة    
          على رصيف اشواقك الدافياتي

تلقّفيني من يدين التشتّات    
          صيريْ بْحلاة الروح قارب نجاتي

هلَّي غلا يمحي كدر كلّ ما فات    
          يامزنة افراحي ومنبع هناتي

مَعْيْ افرحي وارضي عيونٍ حزينات    
          واحيّي زغاريد الفرح في في شفاتي

رزَّي بيارق عيدنا والمسرَّات    
          شوفيْ اللي آسوّي سواتي

يا مبعده رغم اختصار المسافات    
          يا خالده بارض وْسما ذكرياتي

جيتك وحالي ما يبي له مراوات    
          صبري قضى لَو الصّبرِ من صفاتي

اما دموعي بدّليها ابتسامات    
          ولاّ اعزفي لحن العزا في وفاتي