سلام يا حايل حبيبة طي بنت الخيال     
          الليله انتي سيدة حرفي وانا شاعرك

قالوا انك ماكبرتي يا عروس الشمال    
          باقي عروس ويلمع البرّاق بآساورك

لا لا تقولي شيّ عن سرّ البها والدلال    
          إنتي خطاك الغيم حيّي وانا عاذرك

الله عليك ليا تواضعتي وقلتي تعال    
          والله على هيبة غرورك نوب وكابرك

المسعد اللي كل ما ما ريع عليك الظلال    
          لمّ البخَتْري والنفل والشيح عن صابرك

ما ادري حرام الموت بين يديك ولاّ حلال    
          لكني ادري ليه انا احبّك ولا آشاورك

يا مرتع التاريخ لا عدّت فعول الرجال    
          المجد من ماضيك مسراته إلى حاضرك

إنتي ليا جا للكرم طاري وجابوا مجال    
          كلَّ تمنى لو يجي مرّه على خاطرك

وانا ادري انك فوق كلّ اللي نقول ويقال    
          وان النجوم تْغار لّوان القمر جاورك

والشاعر اللي لا كتب بك ما يثير الجدال    
          الله وامانه يا بعد حيّي مهو شاعرك