أمشي وْهمّي جِبَل يمشي معي وين اروح     
          أزريت اشيل الجِبَل وازريت لا افارقه

كل الخطاوي تعَبْ كل الليالي جروح    
          أرضي هجير وسمايه شمسها حارقه

ما غير روح التحدّي في عروقي تفوح    
          قوّة صمودي على جور الزمن خارقه

هذا وانا عزّتي دايم قبالي تلوح    
          لين اصبحت في حياتي ميزٍة فارقه

أرفض شعور الندم وارفض طمان السفوح    
          لو كان فيه الحياة غصونها وارقه

ما دام فيني نِفَسْ يذري وفيني طموح    
          بابٍ وراه اعتزازي طارقه طارقه

رغم امتداد التعَب عيّا يموت الطموح    
          والشمس بكره ورغم انف الدجى شارقه