|
أصل العشق فيني
يكبر مع سنيني
كل ما تطير طيور
تلحق خيوط النور
تتبع شعاع الشمس
ودايم تناديني:
يا بنية لا تنسين
العشق في داخلج
نبضه يحيّيني
العشق في داخلج
مني وفيني
لو رحتي وجيتي:
العشق
بحريني
يا بنت يا صغيرة
يا ملح هالديرة
إنتي ألوان الفريج
وانتي سكة كل طريج
انتي يا بنية
نبضة الغواص في غبة بحر
انتي يا بنية
بسمته لي ضامته شدة دهر
إنتي يا بنية
رحمة الله من عقب حسرة وضيج
يا بنتي يا "منيرة"
إنتي عشق ديرة
وانتي نظر عيني
وعشقج ترى منج كبر فيني
والعشق من يومه ترى
العشق
بحريني
يا بنية لا يغرج هوى عابر
إنتي هواج اللي أصل: قادر
يقلب ظلام الليل نور ويجبر الخاطر
ويروي ظما القلب بوسم ماطر
خلّي هوى قلبج
للي عرف قدرج
واللي بيحفظ هالهوى
في القلب والحاجر
ويرويج من كل الغلا لو طالت سنيني
ولا يغيب عن بالج أبد:
العشق
بحريني
يمّه أنا شفت الهوى طالت مسافاته
يمّه لقيت اللي حضن قلبي ونبضاته
يمّه ترى عثر الطريج انزاح دربه وطِفت عثراته
مدري شاسوّي بالفرح!
اشلون أبدا به؟
واشلون أوصّل بالسلامة لكل محطاته؟!
يمّه! دخيلج: شالسواة؟
يمّه ترى خوفي
تطير الفرحة من عمري
ويطير السعد من فالي
واصير بروحي في عمرٍ
فقد طعمه ولونه
وفقد في العشق نبضاته!
يا بنيتي يا "منيرة"
خلّي إيمانج برب الكون والعزة قوي
قوّي إيمانج بصبرج، وبصلاتج
وادعي من ربج يخلّي الباس في الدنيا قوي
الهوى فرحته منه و فيه
الهوى هَم دمعته، منه و فيه
واللي خلّى قلبج يحس بأصل حبه
ويلمس العشق اللي في قلبه
قادر يخلّي الهوى دايم أصيل
وقادر يرسم البسمة على شفة عليل
يا "منيرة"
خلّي العشق في كلمتج يظهر
حتى في حزات العتب
خلّيه يتبختر
العشق حلّى حياتي وأنا أمّج
وسقيتج سيل من عشقي
وأنا أدرى و أنا أخبَر
انزرع فيج العشق بذرة
واليوم هالبذرة تحاجيني
يا بنيتي لا تخافين
دامج مني وفيني
ودام العشق فينا أصل
ودام العشق
بحريني
|
قم بتسجيل الدخول اولا للتمكن من التعليق على القصيدة