جروحٍ باقيه فيني وصمتـي للحـزن عنـوان    
         وليلٍ لو بقى سرمـد دلايـل قهرنـا وشهـود

أناجي قلبي الشاقـي إلا منـه غـدا بـردان     
          عطيته جمرة أشواقي وضلوعي من دقاق العود

وكني بالفكـر ذودٍ تسـوق أخفافهـا لقلبـان    
          لقت في محجر عيوني مراوي تنعرف بالجود

يحسبون البلا دمعي أسيله من هجـر خـلان    
          ولكن شوقنـا ذوّب خفوقـي وانتثـر بخـدود

قطعتي وصلنا بصكٍّ كتبتـي خطـه بنكـران    
          بنيتـي بيننـا سـدٍّ وهجـرك للبنـا مسنـود

غديت بحالنا طيرٍ صغيـره ريشـة الجنحـان    
          خنقها طفلٍ بكفّـه يمـوت ولا لقـى منشـود

حسبها لعبةٍ بيـده وقلبـه مـا غـدا شفقـان    
          ولا يقدر جناح الطير ضعيفٍ لو بقى مهـدود

وقالوا قلبكم يسلى حبيبٍ مـن عقـب أزمـان    
          ولكن كيف أنا بسلـى وطيفـه دايـمٍ موجـود

وكل ما زارني طيفه أشوف بخافقـي بركـان    
          أنا شفت الهجر نارٍ وقلوب العاشقيـن وقـود

ولو إن الوله يحـرق قلـوبٍ تنتهـي وتفـان    
         بتنهي قصة العاشق ولكن ذي القلـوب تعـود

تعوّد كنها المبلي تعـذّب مـن شقـا النيـران    
          يبدّل جلده الناضج عقب نـار اللظـى بجلـود

على اللي مهتني بوصله سعيدٍ قلت له غلطـان    
          ترى اللي جمّل اللقيا فراقٍ والوصـل مفقـود

أقول لشاربٍ يومه هماج ومـا بقـى ظميـان    
          رويت بشربة أيامك عقب لدّ الـزلال سـدود

وأصبّر نفسي الثكلى على صدّه على الهجران    
          عزاها ينتهي بيـومٍ يجيهـا لا دنـت للحـود