|
يا قلم أكتب قصيده وحضّر الفكـر وزهابـه
يا قلم أرجوك حاول والكرى لا جـاك خلـه
من سنين الخلق كانـت كلمـةٍ فيهـا رتابـه
وكلمةٍ للشوق هاضت والبشـر لا مـا تملـه
قلت أنا بكتب سنينه وش جرى عقب المهابه
في قصر كانت حياته وانتهت وسـط المذلـه
شافها بين الجواري وشافتـه كامـل شبابـه
يا هني منهو سقانـي قالهـا وجاتـه تعلـه
خلته ريّـان ظامـي والظمـا زاده شرابـه
اسقته والعين ظميـا مـن رمـوشٍ مستهلـه
اقفى من خيمة وليفه وقلبه اللـي مـا قفابـه
كنها في النور قمره وكنه الشمـس المطلـه
وانكتب فيهم قصايد من غرامه مـن صوابـه
وصارت علومه بيدينا ومن عشق لازم يشلـه
شاقه امفارق حبيبـه وشاقتـه كلمـة يعابـه
أطرده عنهـا أبوهـا وركّبـه مليـون زلـه
هذا هو مجنون ليلى والقـدر يومـه نوابـه
غرّقه بالشوق حتى انعمى من شـوف ظلـه
وارتحل صوب الخلاوي واديٍ ذيبه عوابـه
رامها وحوش الصحاري والعقل ما ضاع كله
شافه اللي ما هناله عيشته في وسـط غابـه
انكفه لديـار ليلـى وخطوتـه كانـت تدلـه
ولا وصل إلا ويديهـا مخضّبـاتٍ والقرابـه
راقصه في عرس وردٍ يوم أبوها زاد غلـه
واستجن وإن زاد جنه صيحته تنشر عذابـه
راح يهذري من غلاها والرمل في الراس بله
باعته يومه شراها وافتحـت هوجـاس بابـه
وعقدته كل ما عقدهـا جاتهـا بطيفـه تفلـه
انزعت للطير ريشه واكسرت للذيـب نابـه
ومابقى للروح باقي وفي بقايا الـروح علـه
وانتهى قيس بغرامه وانتهى عشـقٍ سطابـه
ابتديت بقيس ثاني صرت أنا عايـش محلـه
|
قم بتسجيل الدخول اولا للتمكن من التعليق على القصيدة