العنود اللّي مسا البارح وانا سيَّد سهَرْها     
         اقبلتْ مثل البياض وودّعت مثل بْرديّه

المسا ضجّ بسوالف عطرها واشعل سفرها     
         والعروق اللَّي روت مسيارها خضر ونديّه

ما نشدْت اخت المهاه ليا متى حَزّة خَدْرها     
         حَدّ علمي يوم امَّد لْجيدها شرهة يديّه

عقْدها المغرور تاه بعطْرها ولاّ نحَرْها     
         ساعةٍ أشره عليه وساعة يشره عليّه

كل مالدَّت على البال والعقْد يْخزًرها     
         قلت انا ماني خويٍ عادته ينسى خويّه

ليتها تدري وعقد الماس لو يدري عَذَرْهَا     
         اشهد ان الجمره اللَّي في الحشا منّي وفيّه

مِنْ سَرَت يمي وانا مالي خيار الاَّ قدرَْهَا     
         كنَّهَا كلَّ السنين المقبله والأوليّه

منْ غَدَتْ هَمّي وانا مالي ديار إلا ديَرْهَا     
         جالها بين الظلوع الظاميه روحه وجيّه

جادلٍ كل الدروب المعشبه تنبت باتَرْها     
         جَتْ تبي جرح وقصيد وخلَّتْ الثنتين ليّه

منْ يحدَّثني حديث الثلج للجمر بثغَرْها     
         والله انَّي كنت ناوي لي بهاك الجمر نّيه

من نشد هاك الوساع الخرس عن دنيا حَوَرْهَا     
         وش جمع سحر الغموض بسودها والنرجسيّه

الوكاد انَّي بشَطّ الكحل غنّيت لْبَحَرْها     
         ما حلا هوسة هدبها والمسا والسامريّه

من يعلّم مستريح الريح عن فوصى شَعَرْها     
         الحرير اللَّي كسى هاك المتون العسجديّه

علموه ان مازح الغرّه ونشّد عن قمَرْها     
         لا يخاف ان شاف له ظلما وشاف الشمس حيّه