|
ضاميه ملت يبـاس الوقـت وأسبـاب الشكـاوي
مابقالـي غيـر قلـبٍ ممتلـي طيـب وحبـابـه
قلبٍ أصغر من هموم الدرب وحصـون البـلاوي
قلبٍ أضعف من هطول الدمـع فـي ليـل الكآبـه
كان طفـلٍ يشعـل بـرود المواجـع بالدعـاوي
وكنت له صـدرٍ يلـم دمـوع ليلـه وإضطرابـه
قال آآآآآه..وصاحت جروحي على صوت الشكاوي
آهته .. عيناه .. قلبـه .. والمكـان اللـي بكابـه
سكة الحرمان .. رجف شفاه .. جمرات الخطاوي
نظرتـه ذيـك البريئـه مـن بـدأ يذبـل شبابـه
العمر هـذا بـدون إحسـاس قلبـه وش يسـاوي
ياعـسـاالله ياعـسـاالله مايلحقـنـي غـيـابـه
طفلٍ إن لاحت بوارق للغـلا .. جانـي حيـاوي
وإن نهره الوقت.. عوّد .. خطوته تدمـي ترابـه
ذاق يتـم الوقـت وتجـرع مـرارات العـداوي
جـرحٍ أبكـم مالقـالـه لامغـيـث ولا قـرابـه
يايبه وينك ؟؟ أنـا مليـت .. ليلـي .. والتعـاوي
من رحلت ومابقا بهالكون مـن أحسـب حسابـه
غيـر طفـلٍ كلمـا سجيـت جابتـه الـحـراوي
جايسـوق خطـاه طفـلٍ مشيتـه طيـب ورتابـه
يايبه مـن غيبتـك زادت جـروح بـلا مـداوي
ثم جرحني الوقت فالطفـل اليتيـم .. وبإغترابـه
غبت غيبه دون رجعـه .. آآآآه يالعـن المنـاوي
كلمـا تمنيـت قلبـك زادنـي الوقـت بعـذابـه
لا والأدهى من عذاب الوقت ..طفلي ..والرجاوي
كلمـا أترجـا ظروفـه جـدت ظـروفٍ هبابـه
وشيبي فيـه المـرض خـلاه قـدم العيـن ذاوي
وشيبـي فيـه الزمـن ماعـاد بجروحـه طبابـه
كلما هبت هبوب .. أشـم ريحـه عـود جـاوي
وكلمـا كنيـت ريحـه .. فـز قلبـي وإحتفابـه
وكلما ناظـرت عينـه .. ماذكـرت إلا النـداوي
وكلما عانقـت صوتـه .. ماذكـرت إلا الربابـه
وكلما تدمع عيونـه.. راحـت عيونـي شـلاوي
وكلما ونت ظروفه .. ضاقـت حـدود الرحابـه
ولو يمل الوقـت مامليـت مـن كثـر الدعـاوي
يـاعـسالله يـاعـسالله .. مايلحقـنـي غيـابـه
|
قم بتسجيل الدخول اولا للتمكن من التعليق على القصيدة