يا آبوي لا يلحقْك شكً ولا ريْب     
         انفض هجوسك وارفع الراس عالي

أنا شبابك لا غزا راسك الشيب     
         وآنا عضيدك لو تجور الليالي

أي والله ابْشرْ يارَعْ الطيب بالطيب     
         والله لـ .. اسدّك لو يضيق المجالي

آمر وتحت امرك تهون المطاليب     
         إنخا وتلقاني قريبٍ موالي

أجيك كلَّي ماخشيت المصاعيب     
         لي طبْت تكفا يا يبه طاب فالي

ان عاش راسي يا عزيز المجاذيب     
         لـ .. اشيل حملك لو يفوق احتمالي

واطفي ظماك ان حَتْرَ بنَّ المشاريب     
         واسقيك من زندي قراحٍ زلالي

وَلاَ يهمَّك يا كريم المواجيب     
         يفداك حالي يايبه والحلالي

أبشر وذيبك يا رفيع الشرف ذيب     
         ياآبوي دام تشوفني لا تبالي