جينا ثلاثتنا مسايير وضْيوف     
         أخوان لو كلَّ لفى من قبيْله

والله لو ما احدٍ محلَّفني احلوف     
         ما واحد منَّا تزاهد حصيله

قلنا نسنَّدها على نقرة (( الجوف ))     
         للدَار حقّ ولـ ابْلَج الشعر ليله

سلام منَّي عِدّ ما يدمح الشوف     
         بعيٍون خِلٍ شاف ميلة خليله

أو عِدّ من عدَّا على راس مشعوف     
         شاعر وقام الريح يطرق شليله

أوعِدّ ما تضحك هنوفٍ لنفنوف     
         ماتن عليه مْنقّضات الجديله

يازين ضمّة نسمة (( الجوف )) بالجوف     
         لا ورَّدت بالبال مثل الخميله

وجه الشمال مْدلّهة كل ملهوف     
         دارٍ عَرَبها كاسبين الجميله

دارٍ لها في ذمّة الوقت معروف     
         حتّى على التاريخ ماهي بخيله

والدار داري وين ماالد واشوف     
         وانا بحب الدار راعي طويله

تبرق شَمَال وتلمع قلوب وسيوف    
         تبرق جنوب وكلّ عزَّ نخيله

وتهب شرق ويشمخ العلم وْينوف     
         وتهبّ غرب ويسرج العزّ خيله

جينا ولا فينا مسايير وضيوف     
         للدار حقّ ولـ ابْلَج الشعْر ليله