|
أكلي حطب !!
بيت الشعر عنـك مانوّيـت بالتوبـه
ولانويت أبتعد عن حمر الأطعاسـي
أستهوي الضو بوجه البيت مشبوبـه
وأستهوي البن يحمس وسط محماسي
وأشفق لشوف الغضى يبسٍ ومحطوبه
وشوف الدلال الصفر يبري تعوماسي
(وأفرح بقرم(ن يكر النار فـي ثوبـه
وريحة غضاها يرد الروح لأنفاسـي
وأسعد بشوف الحلال وحزة غروبـه
الى ضوت للعشا تقرع بالأجراسـي
والبل تبغي العشا ترغـي ومشعوبـه
والراعي اللي مع الحيران محتاسـي
يازين شوفة نجوم الليـل مصحوبـه
مع بدرها اللي ينور عتم الأعماسـي
ينعش فؤادي نسيـم البـر وهبوبـه
وريح الخزامى الياهبـت بنسناسـي
والمهره اللي عسفها العـود بسلوبـه
من دون سرجٍ ركبها عالي الساسـي
وشيهانةٍ للقنـص تطلـع ومطلوبـه
تطلع بعيـد وغلاهـا مالـه قياسـي
بنت البدو شيخـة فطنـه ورعبوبـه
تعوذ مـن كـل شيطـانٍ وخناسـي
الى لفا الضيف مثل البـرق لهلوبـه
سيفٍ تصاقل فملعب كل الأجناسـي
ماعمرها جات مخزومـه ومغلوبـه
غنـدورةٍ والعقـل أنفـوذه سياسـي
مرغوبـةٍ حيـل ايـوالله مرغـوبـه
من مجلسٍ النشامـى فيـه جلاسـي
يا نار أكلي حطـب00 ماعندنا توبـه
حنا بدو دايـمٍ نمسـي فالأطعاسـي
|
قم بتسجيل الدخول اولا للتمكن من التعليق على القصيدة