السّكَبْ دمّ الشفق شيخ الهبايب     
         للسَّكَبْ صيت ومنصّات وبطوله

أشقرٍ كنَّه بقرص الشمس ذايب     
         راهيٍ يازين لفتاته وطوله

عرفه اشقر علَّموا شقْرَ الذوايب     
         خَصْرْه اضمر من حشا البنت الخجوله

لا هَمَا ركضه مثِل وبل السحايب     
         كم نشدْت الريح عن ماسه ولوله

دَلّله متعب ولد عطب الضرايب     
         عَلّفه باس ومقاديم ورجوله

عن عجاج الخيل مفطومٍ وتايب     
         نادرٍ روحه عن الغلْب معَذوله

له معازيبٍ على عوص النجايب     
         طَوّعوا نجد و غَدَت هيبه ودوله

من تهقوى به شَرَب كاس الغلايب     
         مَن يقوله؟ كلّ خلْق الله تقوله

إن علَج صلْب الرسن والحظ طايب     
         أشعلوا بَرْد اليدين وصفّقوا له

وان وَصَل والناس في هوش وطلايب     
         صار كل الهرج عن طيبه وزوله

لِلسَّكَبْ ناس وجماهير وحبايب     
         للِسّكَبْ كاس ومنصّات وبطوله