تذكرين الغـلا والصيـف يالسـوده     
          لمّـة البرق..والخـلاّن والـراعـد

تذكرين القصيد..وسلْمهـة سـوده!     
          واحـدٍ كـان مامثلـه ولاواحـد!!

تذكري غيرَتهَ..ورْضاه..وصْـدوده     
          تذكرين المطر..والشعر..ومساعـد

عاشقك جا يقـود الشمـس وتقـوده     
          دفتـره ياسمين..وغيمـتـه نـاهـد

شاعرٍ من عيونـك يطلـب الـزوده    
          جا يجـدّد قديـم الوِلْـف ويعاهـد

سودة ابهـا يديـن العـذر ممـدوده     
          حجّتـي ماتبـي قاضي..ولاشاهـد

يوم شفتك لصـدْر الغيـم مشـدوده     
          وردةٍ تستغيث..وعطرهـا سـاجـد

(خذْتْ ضيم) الضباب اللي ثنى عوده     
          ماترك لـي قليـل ولاتـرك واجـد

يكفي انِـك علـى ثنتيـن محسـوده     
          بنت عمّ السحاب..وشاعرِك خالـد!