أدخل على الله واسلّم الأمر تسليم    
         واستغفره واستذكره واستميحْه

وِضْح النوايا والمساري مجاهيم     
         والحلم غالي والليالي شحيحْه

سادت مفاهيمٍ وبادت مفاهيم     
         وَيح الزمن يابِنْت الاجواد وَيحْه

خلَّي علوم مّسسين المرازيم     
         واخْذي علوم مْصَمْصَمين القريحه

حِنَّا طنايا عبْس يامْذيَّر الريم     
         حِنَّا مقابيس الوغى يا مليحه

حِنَّا سلايل قاسم الخيل ودْليم (1)     
         وَزْعَاتنا يوم المكايد رجيحه

بَدْوٍ حَفَايا ما اْنصفتنا المقاسيم     
         وبصدورنا عِزَّ تطارخ فحيحه

نرعى رفيق البرق في ساقة الغيم     
         ومن يستبيح حْدودنا ما نبيحه

والِيا تَرعْ في هرجته دَفْش وبْهيم     
         خَطْوَ الهبود اللي تكابر فطيحه

عن ساقط الهرجه نطقّ الملاطيم     
         ومن طاح فيها ما رحمنا مطيحه

نِكْبَرْ عن الطفْسَه ونجزع من الضيم     
         ونْموت ما ناطا شليل الفضيحه

نزوم زومات الرجال المحاشيم     
         ونْهدَ هدّات النمور الجريحه

رَبْعٍ على دَرّ المنايا مفاطيم     
         من هازنا زاغت عجوزه تصيحه

اليا تغشلينا عسير الشغاميم     
         لومك على اللَّي ما يبرهن مديحه

وان لولِشَنْ مَحَشَّمات الملاثيم    
         والموت حَتْرَب بالحناجر ضبيحه

جينا من اقصانا سحابٍ مراديم     
         كلَّ يذكّي حروته عن نطيحه

يازِينْ دَحّ قْفوشنا له ترانيم     
         والعَجّ واقف والفعايل صريحه

كان المنايا سوقها ما بعد سيم     
         والخوف بَرّك بالقلوب الكسيحه

حنا زباينها عَلَيّ الملازيم     
         عِلْمٍ يقريّه النصيح لْنصيحه

واللي بنى بيته نبيّه براهيم     
         انّا طريق المستميت لْضريحه

بِنِيْ رشيد ان عَتّم الجو تعتيم     
         ما للردى فينا ملامح وليحه

اجسر من الرعّاد واكرم من الديم     
         سمر الجباه اهل الوجيه الفليحه

خوّينا نقريه عزّه وتحشيم     
         دخيلنا دونه عن الموت صيحه

يا بِنْت ما حنّا فقارا معاديم     
         لو ما سكنّا بالقصور الفسيحه

تجّار لو حاشت يدينا ملاليم     
         وْمن الغناة نْفوسنا مستريحه

ما نستضيق اليا لفونا معازيم     
         للضيف لو نذبح حدينا ذبيحه

دايم يدينا للعطايا مواليم     
         لي خانت الفزعه وجيهٍ كليحه

طال القريض ومقبل الودّ ومْقيم     
         والبال عَيّا طارقه لا يريحه

اقولها وابصم على القول تبصيم     
         والعلم بَيَّنْ زايفه من صحيحه

ما هو قصورٍ بالحَرَار الصماصيم    
         كلٍ بدرب العزّ قَدْ هبّ ريحه

ومدحي لرَبعي ما يذم الأكاريم     
         ولا يستشكّ الا خبيث الشريحه

والحقّ واضح للرجال المفاهيم     
         والحقد يخرث بالنفوس القبيحه

والشر من جَيّة (مَعَزّي ) (2) وهو نيم     
         واليوم وحده والشريعه سميحه