ماجيتك اشْكي ياحبيبي مِن الضّيق    
          جيتك بغيت ارتَاح مِن كلّ ضيقَه

جيتِك أبي من رُوضتِك بَلّة الرّيق    
          لاْنّ الفُؤاد بْغيبتِك جَفّ ريقَه

يَرقد عَلى صُوت الجراحات ويْفيق     
          ويْمُوت من فَرقاك بَاْبْشَع طريقَه

مافيه بينَه واهْلَ لِـ قْبُور تفريق     
          متْحَمّلٍ بالحبّ مالا يطيقَه

والمشكلَه مابَه بِ شَكْواي تَصديق     
          لا قلْت انّي في غيابك غَريقَه !

هذا الكَلام بْذمّتك فيه تلفيق ؟!     
          طبْع البشَر , مَ تْطيق طعم الحقيقَه

لا تَحسب انّي لا تِغَيّبْت ماضيق     
          الله وكيلك ماتِحَمّل دقيقه !!!

لي مدّةٍ أحتاج للحلْم تحقيق     
          والله بدا الاحسَاس يَفقد بريقَه

الحَكْي مايحتاج فِ الحبّ تنميق     
          مثْل العلاقَه بين شَخْص وْصديقَه

خذ من عذاب الرّوح يا صاح توثيق     
          لا تاه قَلبي ما يضَيّع طريقَه

خلْنا كذا , أحباب من دون تدقيق     
          لا اْحتاج منّا شَخص , لبّى رفيقه