قولو لِـ راشد دَام إنّي هَويتَه    
          في ذمّتي مَحدٍ في عيني يساويه

وانّي ترَكْت الغير لاجْلَه وجيته    
          حطّيت رِحْلي والغلا في موانيه

قلبي وحبّي والمشَاعر عطيتَه    
          وان ماكفَتْه ..العين والرّوح بَعطيه

أفداه كلّي .. ياجِعِلْني فديته    
          لحدٍ يلوم النّفس لو يومْ تفديه

دامَه عطَاني حب ماقد رأيته    
          واهْداني الدّنيا على راحة ايْديه

والهمّ قربَه دونْ مَشْعر نسيته    
          والحزْن طاحَت في وجودَه مبانيه

كلْما بكيت .. فْـ عزّ همّي لقيته    
          وانسى عذابي في حضُوره .. واروّيه

ان ضمّني .. من ماي عيني سقيته    
          وان باسِني من نَشوة الروح بسقيه

وان كان بابْياتي أنا ماوفيته    
          وشهُو بعَد بُوح الأحاسيس يوفيه ؟!

ليتَه يشوف شقد أهواه .. لَيته    
          كثْر الدفا يوم اندمَج خافقي فيه

لِعْيون \" راشد \" .. بَنهي اللي بديته    
          واختِم قصيدي لاجْل عَينه واراضيه