|
لي صاحب ما شفت منهو يحاليه
ولا فيه غيره في عيوني تحالاه
اتبع خياله وين ماراح وادعيه
والى لفاني قلت ياحي ملفاه
اول ابي قربه وضمت اياديه
ومافيه غيره اعشقه واتمناه
الين ماعكر مع الوقت صافيه
والنفس عافت من توده وتبغاه
قطعت له وعدن ولا يمكن اوفيه
وعدن بتركه خير وشلون بوفاه
لكل بداية وقت ؛؛ساعه وتنهيه
وهذي نهاية وقت؛؛ ساعة بديناه
واليوم انا ماابيه ماابيه ما ابيه
واستخلف الله فيه ؛؛ والله يرعاه
هو يدري بمعنى كلامي وداعيه
ومافيه داعي اشرح اليوم معناه
احسن لي ابعد عن عيونه واخليه
ابقى على الذكرى ؛؛ ولايمكن انساه
ويبقى غلاه بداخل القلب يحييه
ذكرى جميله كل ماحل طرياه
ويبقى خياله عالق بي واناجيه
لا طال بي ليل الالم والمعاناه
خلاص ابرحل مابقى شي نحكيه
وماعاد ينفع حكينا لو حكيناه
ااودعه والله يحرسه ويحميه
ووالله من شر الصواديف ياقاه
|
قم بتسجيل الدخول اولا للتمكن من التعليق على القصيدة