مانمت لا والله ولا جاني النّوم    
          وْلا صار عندي وقت ارتاح ليله

لا نمت راودني كوابيس وحْلوم    
          وعفت المنام بْروح ثَكلى ثقيله

سنين عدّت كنَّها بس كم يوم    
          ياليت لحظات السعاده طويله

من شهْر ستّه عام ألفين .. والقوم    
          يهجون قلبي يوم عانق خليله

كلّن من الشرهه والعْتاب واللوم    
          يسقون روحٍ بالمواجع عليله

لو بشرح القصه ترى صارت عْلوم    
          وصارت مشاكل بين أهل القبيله

المسأله في كوم ..والنّاس في كوم    
          وانا صغيرة سن .. ماهي قليله !

خُيّرت بين الأهْل والحق مهضوم    
          وقلبي من اوّلْها يفارق خليله

ولاّ أعيش بْقلب بالحب محروم    
          من ناسه وأهْله .. وَلَا فيه حيلَه

قالوا ترى قلبي بهالحب موهوم    
          وانا لعلْم النّاس عيني هميله

حطّيتو بْدربي سحابات وغْيوم    
          لين انذبل كبدي بساعة رحيله

ياناس محبوبي ترى جد مظلوم    
          وْلابَه بهالدنيا ياعالم مثيله

وْلو صار إحساسي على الهم معزوم    
          لبّيت دعوات المواجع .. واجيلَه

ربّيت همّي وانقَلَب إسْمي (هْموم)    
          وعايشت روحٍ بالمآسي نحيله

مالي سوى عمْرٍ أعزّيه .. مرحوم    
          وقلبٍ شكى لي في الهَوى واشتكي له

على فراق اللي به القلب مهموم    
          والروح به صارت جريحه ذليله

من شهْر ستّه .. والخفوق بْه ملزوم    
          عدّة سنين وْعشت قصّه جميله

بالحب والبسمه على دايم الدّوم    
          لكن ياليت انّ السعاده طويله