مقصّر ؟! ليه تسألني مدامي مو على بالك    
          وتقصيرك يامحبوبي مَهُو محتاج للتبرير

نسيت الحب والعشره .. دفَنت الودّ باهْمالك    
          كسرت جْناحي المُرهف .. ولا اقْدَر ياالحبيب آطير

حسبت انّك بتتغير .. ولكن شانت افعالك    
          ثلاث سنين لكنّك ولا قابل لأيّ تغيير

وجيت بيوم ميلادي تبرر جرم ترحالك    
          تعَذّر لي وانا ماني بحاجه لْشرح أو تفسير

على قولتْك تَبغاني اعيش ايامي قْبالك    
          اذاً حقق طموحاتي .. ابي حشمه ابي تقدير

وابي كلمه تنسّيني ..برودة قلبك الحالك    
          وابي من قلب تهديني ( عسى كل عام وانتي بخير )

وابي تسأل عن احوالي .. مثل مَـ اْسْأل عن احوالك    
          وابي تشتاق لي وابْغى يعذّب قلبك التفكير

هدايا ؟ ماني بْحاجة هدايا ,, وفّر اموالك    
          هَدَاياكْ ايش معناها ؟ بدون البوح والتعبير !

عموماً روح خذ وقتك ..وكمّل باقي اشغالك    
          وانا باقول لك شكراً على الاهمال والتقصير