لو كنت ميت كان والله قام وقعَد    
          لكنّ فاق موت الاحساس كل الهقاوي

جيتك بسابق وعد مني وقداسة عهَد    
          لا ما لواني بذلة النفس والهون لاوي

لك جيت باحساسٍ ومن قبل ما أجي جسَد    
          جيتك بقلب امشبعٍ بالاحاسيس راوي

مشيت لك دربٍ بعيد أظلمٍ وبجهَد    
          أعدو بعزم الصافنات وبروح النداوي

أبي دفا عقب الصقيع وذاك البرَد    
          جيت ولقيت أرضك بها الزرع محروم ذاوي

لو كان نصف السيل وحلٍ والآخر زبَد    
          ترجيه ناس اكبودها يابساتٍ ظماوي

جنين حبي أجْهضْتَه وقبل سنّ المهَد     
          مات الفرح ذابت معه بي خيوط الرجاوي

مات الجنين من الحنين ودفن للأَبَد    
          والجوف صار الخوف مرتعْه والليل ضاوي

عزفت في دقات قلبي وطبول الرعَد    
          وصفير ريحٍ مالي الكون بالصوت عاوي

قصيدةٍ للحزن تصوير للّي ورَد    
          وصارت تفاصيلٍ على لسان كل راوي

ولا قالت امك اذبح الذيب ثم الأسَد    
          قدّامها! قل: ذابحٍ قبل قلب المهاوي !

!