يا ناس انا بالحب جاوزت حدّي    
          ضاع الخفوق بين راجي وطلاب

شخصٍ غدا بالقلب ما كان ودّي    
          شخصٍ وسيمٍ خاطري منه ماطاب

طيب شجاعٍ ما يعرف التردّي    
          شهم جوادٍ منظره حيل جذاب

لمحت انا زوله وبيّحت سدّي    
          شوقه فضحني وخافقي من الغلا ذاب

بجلسته يشبه لمنظوم عقدي    
          يلمع وكنّه ماسةٍ بين الأصحاب

رجولته تشدّني ليه شدّي    
          وتشدّني له وقفةٍ بأحْلك اصْعاب

لا جيت انا اعاند وطوّلت صدّي    
          سيطر علي بأسلوب عذبٍ وخلّاب

ان قلت صعبْ قال أنا للتحدّي    
          وان قلت عالي قال أنا لامس اشْهاب

لشخص مثله كيف بس التصدّي    
          لا بد ما اقْلوب النسا منّه اتْصاب

محبوب من قبلي وبينحب بعدي    
          يصوّب قْلوب النسا بلا ايّة احْساب

فرقي انني بالعمر لاجله أفدّي    
          لأجله أبيع العمر وأرْخص له أرقاب

ما هي وسامته ولا مزاياه قصدي    
          أحبه لشخصه ولو كله ايْعاب!!