قَدرك يا غالي مو عَلَى العين والرّاس    
          قَدرك مكَانَه بين قَلبي وبيني ..

لو نور عيني صَار للحب مقيَاس    
          والله لَيُوصَل حبّك لْـ نُور عيني !

كل القصَايد والمشَاعر والاحسَاس    
          والحب الاسمَى .. والورُود وحَنيني

والشّوق .. .. تسكن كلّهَا قَلب حسّاس    
          يطغَى عَلَى روحي وْما يحتويني ..

قلبٍ من اسباب الغَلا شاربٍ كَاس    
          سكران في حبّك .. وعيّا يجيني

حبّك طفَى فيني ترى شمعة اليَاس    
          واشْعَل يا غالي شمعة الحب فيني

حبّك تزيّن لي كَمَا عَقْد ألماس    
          كلْما اشوفَه ..خَان صَبري يِديني

مالي بدونك أيّ قوّه ولا بَاس    
          لو كنت نَاوي تبتعد عن سنيني

من يوم يومي أحسِن الظّن بالنّاس    
          وياجعْل حبّك ما يخيّب ظنيني ..