تداعت ذكريات ونادت أصوات ولمحت طيوف    
          الأول قال معنى! قالوا الباقين وش معنى؟

بغيت اصد كالعاده: وأبرر صدتي بظروف    
          ولكن كل درب أمشيه مقفي صار يجمعنا

أنا والجرح والدمعه: وطيفك والرجا والخوف    
          وصوت العاذل اللي كان يغرينا ويمنعنا

ولبيت الندا رغبه: وبددت الظنون عزوف    
          عقب ماذاب تالي سمل صبر به تلفعنا

لقيت العزم مايمدي: وجفن الذاكره مطروف    
          وضيعنا صدى صوت يدوي في مسامعنا

سرى ما أسرى بقايا حلم: لا منكر: ولا معروف    
          مثل وجه الغريب: اللي يذكرنا مرابعنا

وأنا الملم شتاتي واتهجي من شقاي حروف    
          كذا الأقدار تمنعنا بيوم ويوم تدفــعنـــا

خذاك البعد وأقرب من عناك لقلبي الملهوف    
          بقايا الطيف والذكرى وما يحيي مواجعنا

حلاك: وما بقلبي من غلاك اكبر من الموصوف    
          ولا ودعت حر الشوق من ليله موادعنا

عيون ماتشوفك يا بعدها وش تبي بالشوف    
          ودنيا ما أنت فيها العمر كلها مالها معنى